رئاء في جدتي (ام سليمان) للشاعر/ مساعد بن محمد بن عيد

مساعد العيد

السلام عليكم ورحمه الله وبركاته
قصيدة رثاء في أم سليمان (جدتي) رحمها الله ٠٠ وجميع موتى المسلمين.

عامٍ ونورك يا البديعة مطافي "
غاب القمر لكن عن البال ماغاب

قبل اتوفّى قالت العلم وافي "
قالت لي أن الموت واقف على الباب

تعبّرت والدمع في العين خافي "
ضميتها ضمة وداعٍ للأحباب

كني طريدٍ واطي الشوك حافي "
والا شجيعٍ وسط الأضلاع منصاب

والا كسيرٍ تحت ذر السوافي "
والا كريمٍ عجز عن عون الأصحاب

الموعد الجنة ويا لله يا كافي "
ترحم عجوزٍ في السّلم راسها شاب

أشهد لها بالطيب والقلب صافي "
ويشهد لها زوّارها قراب واجناب

ما كنها الا شعر وانحن قوافي "
وعدّت قصيدتنا طويلين الاشناب

وادعتها بالعين قبل انصرافي "
نظرة وداعٍ جرحها ما بعد طاب

يبكيك قصر الطين والقصر طافي"
بنت المطر غبتي وطاريك ما غاب

يمّي لبستي ثوبٍ أبيض وضافي "
يوم الثياب ملطخة طين وتراب

وش جاب قدر الفوح فوق الأثافي "
وباقي القدور البيض في وسط دولاب.

شعر : مساعد بن محمد بن عيد